План пераходу на экаўпакоўку зацверджаны ў Беларусі. Удзел у яго рэалізацыі возьме і канцэрн "Белляспаперпрам".

План зацверджаны пастановай Савета Міністраў ад 13 студзеня 2020 года №7, паведамляе БЕЛТА са спасылкай на сайт урада.

Планам прадугледжана, што пры правядзенні масавых мерапрыемстваў будзе арганізоўвацца паасобны збор адходаў, у 2020-2021 гадах укарэняць дэпазітную (закладная) сістэму звароту спажывецкай упакоўкі. Запланавана павялічыць аб'ёмы вытворчасці экалагічна бяспечнай (у тым ліку папяровай, шклянай, біяраскладальнай) упакоўкі.

МАРТ разам з зацікаўленымі даручана вызначыць пералік аднаразовага пластыкавага посуду, выкарыстанне і продаж якога будуць забароненыя ў аб'ектах грамадскага харчавання з 1 студзеня 2021 года.

Акрамя таго, неабходна будзе прадумаць эканамічныя стымулы для пераходу на экаўпакоўку. У 2021 годзе ва ўрад трэба ўнесці праект пастановы, які прадугледжвае паэтапнае абмежаванне максімальнай ёмістасці палімернай тары, якая ўжываецца для разліву піва і слабаалкагольных напояў, да 1 літра ўключна.

У галіне правядзення навуковых даследаванняў мяркуецца рэалізаваць план дзеянняў па стварэнні тэхналогіі і вытворчасці біяраскладальнага пакавання з расліннай сыравіны.

Рэспубліканскім органам дзяржкіравання, іншым дзяржарганізацыям, падпарадкаваным Ураду, Нацыянальнай акадэміі навук, аблвыканкамам, Мінскаму гарвыканкаму даручана забяспечыць выкананне плана мерапрыемстваў.

Пастанова ўступае ў сілу пасля яе афіцыйнага апублікавання.

Паглядзець дакумент: http://www.government.by/ru/solutions/3735

Крыніца: БЕЛТА