З Днём настаўніка рэктара Беларускага дзяржаўнага тэхналагічнага ўніверсітэта Ігара Войтава і ў яго асобе ўвесь прафесарска-выкладчыцкі склад ВНУ павіншаваў канцэрн «Белляспаперпрам».

Звяртаючыся да Ігара Вітальевіча з віншаваннем, намеснік старшыні канцэрна Аляксандр Пшенны адзначыў, што БДТУ заўсёды быў і застаецца галоўнай кузняй кадраў для прадпрыемстваў лясной, дрэваапрацоўчай і цэлюлозна-папяровай прамысловасці.

БДТУ - буйны навучальны і навуковы цэнтр міжнароднага ўзроўню, які валодае высокаінтэлектуальным прафесарска-выкладчыцкім складам і таленавітай студэнцкай моладдзю.

Дзякуючы нястомнай працы і актыўнаму садзейнічанню спецыялістаў універсітэта ў Беларусі актыўна развіваюцца высокаэфектыўныя тэхналогіі і спосабы лесакарыстання, перапрацоўкі драўніны, у лесапрамысловую вытворчасць укараняюцца апошнія дасягненні навукоўцаў і практыкаў.

Сярод выпускнікоў ВНУ - мноства людзей, чые імёны складаюць гонар нашай краіны. Гэта буйныя навукоўцы, дзяржаўныя дзеячы, таленавітыя інжынеры, хімікі, эканамісты і многія-многія іншыя. Высокаадукаваныя выпускнікі БДТУ працуюць і на прадпрыемствах канцэрна "Белляспаперпрам", з'яўляюцца паспяховымі кіраўнікамі.

Усё гэта, безумоўна, заслуга настаўнікаў, якія аддаюць шмат сіл і ўвагі навучальнаму працэсу, дзеляцца сваімі ведамі і вопытам з вучнямі і даюць ім трывалы падмурак для развіцця ў прафесіі.

02.10.2020 12:58