Сёння ў Гомелі ўзнагародзілі прадпрыемства рэгіёну - лаўрэатаў рэспубліканскага конкурсу "Лепшы экспарцёр 2019 года". У іх ліку вядучае прадпрыемства цэлюлозна-папяровай галіны краіны ААТ "Светлагорскі ЦКК".

Узнагароду генеральнаму дырэктару прадпрыемства Юрыю Круку ўручыў старшыня Беларускай гандлёва-прамысловай палаты Уладзімір Улаховіч.

Светлагорскі цэлюлозна-кардонны камбінат па праве ўдастоены звання лепшага экспарцёра. У 2019 годзе прадпрыемства экспартавала амаль 67% ад агульнага аб'ёму вырабленай прадукцыі на суму 64,3 млн долараў ЗША, што больш чым у 2,4 разы перавысіла ўзровень экспарту 2018 года. Геаграфія паставак камбіната ахапіла 24 краіны ад найбліжэйшых краін Расіі, Польшчы, Літвы і Латвіі да далёкага Кітая. Найбольшыя аб'ёмы прадукцыі Светлагорскі ЦКК пастаўляе ў Кітай - 76% ад агульнага аб'ёму экспарту. Пры гэтым у 2019 годзе адгрузкі ў Кітай выраслі ў 3,5 разы ў параўнанні з 2018 годам.

Сёлета Светлагорскі ЦКК таксама лідзіруе сярод экспарцёраў цэлюлозна-папяровай прамысловасці. За 8 месяцаў камбінатам за мяжу пастаўлена прадукцыі на 74,7 млн долараў ЗША, што амаль у 2 разы больш, чым за аналагічны перыяд мінулага года. Пашырылася і геаграфія экспарту да 27 краін. Адкрыліся такія рынкі збыту як Фінляндыя, Швейцарыя, Карэя, Пакістан, Турцыя і Сірыя, некаторыя з іх прыйшлі на змену менш прэміяльным рынкам. Павялічылася і доля экспартуемай прадукцыі да 76,4%.

На Светлагорскім ЦКК з улікам філіяла ў г.Чашнікі Віцебскай вобласці працуе амаль 2700 чалавек. Сярэднямесячная заработная плата па прадпрыемству перавышае 1500 рублёў.

Вынікі конкурсу, які праводзіцца штогод Беларускай гандлёва-прамысловай палатай сумесна з Міністэрствамі архітэктуры і будаўніцтва, аховы здароўя, замежных спраў, лясной гаспадаркі, прамысловасці, сельскай гаспадаркі і харчавання, транспарту і камунікацый, эканомікі, аблвыканкамамі і Мінскім гарвыканкамам, адміністрацыяй Парку высокіх тэхналогій, Белэксімгарантам, Беларускай універсальнай таварнай біржай, былі падведзеныя яшчэ ў красавіку 2020 г.па выніках мінулага года пераможцамі вызначаны 22 прадпрыемствы, 21 узнагароджана заахвочвальнымі дыпломамі.

Традыцыйна для ўшанавання лаўрэатаў конкурсу БелГПП праводзіла ўрачыстую цырымонію ў Палацы Рэспублікі. Сёлета эпідэміялагічная сітуацыя зрабіла традыцыйны фармат немагчымым. У сувязі з гэтым рэспубліканскім аргкамітэтам было прынята рашэнне аб арганізацыі ўзнагароджання ў кожным з рэгіёнаў краіны паасобку.

Сёння такая цырымонія прайшла ў Гомелі перада пачаткам пашыранага пасяджэння Гомельскага аблвыканкама, у якім прымае ўдзел і старшыня канцэрна "Белляспаперпрам" Міхаіл Касько.

Прэс-служба канцэрна "Белляспаперпрам"

22.10.2020 11:15