Біржавы механізм эфектыўны для развіцця імпартазамяшчэння і гандлю ў ЕАЭС. Пра гэта заявіў журналістам прэм'ер-міністр Беларусі Раман Галоўчанка падчас наведвання Беларускай універсальнай таварнай біржы.

"На мадэлях сумесных біржавых пляцовак і абкочваюцца мадэлі будучых агульных рынкаў электраэнергіі, энерганосьбітаў і гэтак далей. Была ідэя ў рамках Саюзнай дзяржавы разгледзець пытанне стварэння адзінай уніфікаванай біржы, але потым ад яе адмовіліся. Зараз, хутчэй за ўсё, гэта будзе рэалізавана ў форме пагаднення аб супрацоўніцтве. Гэта значыць, у першую чаргу тавары будуць прапаноўвацца нацыянальным пакупнікам, каб задаволіць у прыярытэтным парадку патрэбнасці айчыннага рынку. Калі будзе рэалізаваны не ўвесь аб'ём, тавар будзе перадавацца на агульную саюзную біржу альбо біржу ЕАЭС. Зараз на гэты конт вядуцца кансультацыі. Пакуль канчатковы механізм не вызначаны, але патэнцыял адназначна маецца", - сказаў Раман Галоўчанка.

Паводле яго слоў, перад Беларускай універсальнай таварнай біржай стаяць задачы забяспечыць эфектыўныя продажы беларускай прадукцыі, ліквідаваць неабгрунтаванае пасрэдніцтва, павысіць аддачу ад здзелак, зрабіць іх больш простымі і зразумелымі, абараніць інтарэсы прадаўцоў і пакупнікоў. Акрамя таго, важна рэалізаваць патэнцыял імпартазамяшчэння. "БУТБ - дастаткова эфектыўны інструмент. За апошнія гады ўдалося выйсці на сур'ёзныя аб'ёмы продажаў, у сукупнасці гэта каля Br10 млрд. у біржы 29 тыс. кліентаў, якія здзяйсняюць экспартныя і імпартныя аперацыі. Ўзятыя нядрэнныя тэмпы, але трэба будзе яшчэ немалая работа ў гэтым напрамку", - звярнуў увагу прэм'ер-міністр.

У маі Беларуская ўніверсальная таварная біржа запусціла новы інструмент для бізнесу - пляцоўку імпартазамяшчэння. "За два месяцы лічбы ўжо досыць уражлівыя - здзейснена больш за 4,5 тыс. здзелак на суму звыш Br35 млн. Калі казаць аб перавагах, на пляцоўку дапускаюцца толькі верыфікаваныя прадаўцы, пошук тавару максімальна аўтаматызаваны, кошт абслугоўвання ніжэй, чым на іншых падобных пляцоўках. Трэба гэтую пляцоўку раскручваць, таму што гэта вельмі эфектыўны механізм для рэалізацыі задач аператыўнага імпартазамяшчэння", - падкрэсліў Раман Галоўчанка.
Старшыня праўлення БУТБ Аляксандр Асмалоўскі адзначыў, што дзякуючы пляцоўцы імпартазамяшчэння прадпрыемства атрымалі вялікі выбар тавараў, з якімі былі складанасці з-за ўвядзення заходніх санкцый. "Думаю, у далейшым тыя прапановы, над якімі мы цяпер працуем, дазволяць павялічыць патэнцыял пляцоўкі, аб'ёмы продажаў. Біржа не спыняецца на дасягнутым. Пляцоўка была распрацавана для малога і сярэдняга бізнесу, але ў далейшым нашы распрацоўкі дазволяць прыцягнуць даволі буйны бізнес і здзяйсняць здзелкі на сумы звыш 1 тыс.базавых велічынь (1 БВ - Br32. - Прым. БЕЛТА)", - праінфармаваў ён.

Крыніца: БЕЛТА

03.08.2022 11:46